2026 оны Бүх гишүүдийн хурлаар манай хоршооны 2025 оны үйл ажиллагааны цэвэр ашгийг хуваарилах шийдвэрийг гаргасан. 2025 онд нийт 429,411,261 төгрөгийн цэвэр ашигтай ажилласан бөгөөд энэхүү ашгийг гишүүд болон хоршооны ирээдүйн тогтвортой хөгжилд чиглүүлэн хуваариллаа.
Тус шийдвэрийн дагуу цэвэр ашгийн 10 хувь буюу 42,232,182 төгрөгийг ногдол ашиг болгон гишүүдэд хуваарилж, татварын дараах 38,008,964 төгрөгийг гишүүдийн хоршоон дахь хадгаламж болон хуримтлалын дансанд шилжүүлэн байршуулсан. Энэ нь гишүүдийн хуримтлалыг нэмэгдүүлэх, санхүүгийн сахилга батыг дэмжих, урт хугацааны үнэ цэнийг өсгөхөд чиглэсэн шийдвэр юм.
Үүнээс гадна цэвэр ашгийн 70 хувь буюу ойролцоогоор 302 сая төгрөгийг хоршооны 5 санд хуваарилж, санхүүгийн тогтвортой байдал, эрсдэлийн хамгаалалт, ирээдүйн өсөлтийн суурийг бэхжүүллээ.
Энэхүү ашиг хуваарилалт нь манай хоршооны тогтвортой, ашигтай үйл ажиллагааны бодит илэрхийлэл бөгөөд гишүүдийн хамтын оролцоо, итгэлцлийн үр дүн юм. Бид цаашид ч гишүүдтэйгээ хамт үнэ цэнэ бүтээж, тогтвортой өсөлтийг ханган ажиллах болно.
Зээлдэгч нарт зээл авахад үүсдэг нэгэн дарамтыг багасгах зорилгын хүрээнд Тэргүүлэгчдийн зөвлөлийн 2025 оны 10-р сарын 14-ны өдрийн 8/25 дугаар тогтоолоор 2026 оны 1 дүгээр сарын 1-ний өдрөөс Зээлийн үйлчилгээний шимтгэлийг 0% болгох шийдвэрийг гаргаж, хэрэгжүүлж эхэллээ. Зээл олголтыг шимтгэлгүй болгосноор гишүүддээ илүү хүртээмжтэй, шударга, гишүүнд ээлтэй санхүүгийн үйлчилгээ үзүүлэх юм.
Хоршоо цаашид ч гишүүдийнхээ эрх ашгийг нэн тэргүүнд тавьж, илүү хүртээмжтэй, найдвартай санхүүгийн үйлчилгээ үзүүлэхэд чиглэсэн бодлого, шинэчлэлийг тасралтгүй хэрэгжүүлэх болно.
Манай хоршоо гишүүддээ зөвхөн санхүүгийн үйлчилгээ үзүүлэхээс гадна амьдралын чанарыг дээшлүүлэх, шинэ боломж нээх зорилгоор гадаад аяллын хөтөлбөрийг амжилттай хэрэгжүүллээ. Энэ удаагийн аялалд нийт 30 гишүүн хамрагдаж, 2026 оны 3-р сарын 15-ны өдөр Улаанбаатар хотоос хөдлөн 7 шөнө, 8 өдрийн хугацаанд Бүгд Найрамдах Турк Улсад амжилттай аялж ирлээ.
Аяллын хүрээнд гишүүд Истанбул, Анталъя, Памуккале зэрэг түүх, соёл, байгалийн гайхамшгийг агуулсан хотуудаар аялж, олон улсын орчныг газар дээр нь мэдэрч, шинэ туршлага хуримтлууллаа.
Энэхүү аялал нь гишүүдийн хоорондын уялдаа холбоог бэхжүүлэх, хамтын соёлыг хөгжүүлэх, гишүүн төвтэй үйл ажиллагааг бодитоор хэрэгжүүлэхэд чухал хувь нэмэр оруулсан үйл ажиллагаа боллоо. Манай хоршоо цаашид гишүүддээ зөвхөн санхүүгийн үйлчилгээ бус, туршлага, боломж, үнэ цэнийг бий болгох үйл ажиллагааг тогтмол хэрэгжүүлэн ажиллах болно.
Хадгаламж зээлийн хоршооны 25 жилийн ойн арга хэмжээ 1 дүгээр сарын 17-ны өдөр Astory Grand Hall-д амжилттай зохион байгуулагдаж, гишүүд, удирдлага, салбарын төлөөлөл болон хамтрагч байгууллагууд нэгэн дор цуглан өнгөрсөн 25 жилийн замнал, ололт амжилтаа дүгнэж, ирээдүйн зорилго, чиглэлээ хэлэлцлээ.
Өдрийн арга хэмжээний эхэнд Бүх гишүүдийн ээлжит хурал 11:00 цагт эхэлж, 15:00 цагт өндөрлөв. Хурлын үеэр байгууллагын үйл ажиллагааны тайлан, санхүүгийн үзүүлэлтүүд, хэрэгжүүлсэн ажлуудыг Хоршооны Тэргүүлэгчдийн зөвлөлийн Дарга Б.Тэгшбаяр, цаашдын хөгжлийн төлөвлөгөөг Гүйцэтгэх захирал Ц.Оюунцэцэг танилцуулж, гишүүд санал бодлоо солилцон, хамтын шийдвэр гаргасан юм. Энэхүү хурал нь ил тод байдал, хариуцлага, гишүүдийн оролцоог хангах чухал ач холбогдолтой байлаа.
Оройн 18:00 цагаас 25 жилийн ойн хүндэтгэлийн зоог барих ёслолын арга хэмжээ эхэлж, удирдлагын мэндчилгээ, талархал илэрхийлэл, олон жил үр бүтээлтэй ажилласан гишүүд, ажилтнуудыг алдаршуулах үйл ажиллагаа өрнөв. Мөн Монголын нэр хүндтэй уран бүтээлчид болох ХУРД, Ариунаа, Түмэх эх чуулга, Seryoja нар уран бүтээлийн дээжээрээ чимж, оролцогчдод мартагдашгүй дурсамж үлдээлээ.
Түүнчлэн арга хэмжээнд Улсын Их хурлын гишүүн, Монголын Хоршооллын үндэсний нэгдсэн холбооны Тэргүүн Г.Тэмүүлэн, Санхүүгийн зохицуулах хорооны Хадгаламж зээлийн хоршооны газрын Дарга Ц.Алтантуул, Монголын Хадгаламж зээлийн хоршоодын үндэсний холбооны Гүйцэтгэх захирал Б.Амаржаргал болон орон нутгийн олон хадгаламж зээлийн хоршоодын төлөөлөгчид хүндэт зочдоор уригдан оролцсон нь ойн арга хэмжээний ач холбогдлыг улам нэмэгдүүлэв.
Энэхүү ой нь хоршооны өнгөрсөн түүхийг хүндэтгэхийн зэрэгцээ гишүүддээ чиглэсэн чанартай үйлчилгээ, санхүүгийн хүртээмжийг нэмэгдүүлэх, тогтвортой хөгжлийг цаашид үргэлжлүүлэх зорилгыг дахин баталгаажуулсан онцгой өдөр боллоо.
